Article dans Berria 31.07.2004

Alain Sole preso politiko bretainiarrak medikuen zaintzari uko egin dio eta greba hasi du La Sante kartzelan (Paris). Fiskaltza antiterroristaren aldetik sufritzen duen jazarpenari protesta egiteko hasi du greba Solek.

Poliziak ARB Bretainiako Armada Iraultzailearen inguruan hasi zuen ikerketan atxilotu zuten Sole, 1999ko urrian. 51 urteko presoak osasun arazo larriak ditu, eta behin baino gehiagotan egon da hiltzeko zorian. Sole diabetiko kronikoa da, eta kartzelan jada izan du infartu bat, ebakuntzan zubi koronario bat egin behar izan zioten. Uztailaren 9an epaileak baldintzapeko askatasuna agindu zuen Solerentzat eta hilaren 12an eskaera onartua izan zen. Fiskaltza Antiterroristak epailearen erabakiaren aurka errekurtsoa aurkeztu zuen. Alain Soleri sei urteko kartzela zigorra ezarri zion Parisko Gorteak martxoaren 26an. 1998an eta 1999an hiru atentatutan parte hartzea leporatu zion Gorteak eta Plevin herrian (Côtes-d'Armor) lehergailuak lapurtzeagatik ere salatu zuen. Hala ere, Solek baldintzapean aske irteteko kondizioak betetzen ditu eta «helburu terroristak dituen gaiztagile taldeko kide» izateagatik jaso duen kartzela zigorraren erdia baino gehiago jada garbitu ditu kartzelan. Bestalde, Alain Sole kartzelan edukitzea ez dator bat 2002ko martxoaren 4an sinatu zen Kouchner legearekin. Lege horren arabera, preso bati zigorra ken dakioke kartzelan jarraitzeko baldintzak eta presoaren egoera bateraezinak badira, edo presoa hil edo biziko egoeran baldin badago. Lege honek baditu bi aurrekari: Maurice Papon prefektu ohiari 10 urteko kartzela zigorra ezarri zioten humanitatearen aurkako krimenetan parte hartzeagatik, eta bi urtera aske utzi zuten. Loic Le Floch-Prigent Elf petrolio enpresako zuzendariari bost urteko kartzela zigorra ezarri zioten eta 10 hilabete bakarrik igaro zituen kartzelan, Kouchner legean oinarritu zelako. Alain Solek hilaren 19an hasi zuen zaintza medikoen greba, tratamentu kardiobaskularrari eta intsulina injekzioei uko eginez. La Sante kartzelako administrazioak zaintza mediko berezia agindu zuen Solerentzat, eta egunero medikuaren bisita izaten zuen. Isabelle Coutant-Peyre Soleren abokatuak komunikabideei bidalitako eskutitz batean jakitera eman zuenez, Solek ez du onartzen fiskaltzak bere baldintzapeko askatasunaren epaiari errekurtsoa aurkeztu izana. Preso bretainiarrak esan du bere zigorra beteko duela, baina familiatik gertu baldin badago, eta Naonedeko kartzelara eraman dezaten eskatu du. Otsailean eta ekainean ere beste bi greba egin zituen zaintza medikoei uko eginez. Kasu haietan, kartzelako baldintza txarrak salatzea zen bere helburua. Alain Soleren bizitza arrisku larrian dago, baina presoak azaldu du egoera azken hariraino eramango duela Naonedeko kartzelara eramaten ez badute. Bestalde, Isabelle Coutant Peyre abokatuak esan du Dominique Perben Justizia ministroa dela gerta daitekeenaren erantzule bakarra. Alain Solek sufritzen duen eraso polizialaren eta judizialaren beste kapitulu bat gertatu zen duela aste batzuk. Presoak 1999an atxilotu zuten polizia berberen galderei erantzun beharra izan zuen berriro ere. Gilbert Thiel epaile antiterroristaren aginduz, poliziek bi orduko galdeketa egin zioten ustez Belfort-eko (Frantzia ekialdean) udaletxearen aurkako atentatuan parte hartzeagatik. Atentatua 1998ko urriaren 29 gauean gertatu zen. Alain Solek azaldu du sumario hori duela sei hilabetetik dagoela zintzilik. Epaileak sinesgarritasuna galdu duela gaineratu du presoak.