Article dans Berria-07.08.2004
GroenlandiaBRETAINIA
Alain Sole: «Kulturaren aldeko militantzian jarraituko dut»
Fiskaltza Antiterroristaren errekurtsoa baztertu du Parisek eta Sole aske utzi
dute baldintzapean
ander fadda - NAONED
Alain Sole preso politiko bretainiarra baldintzapeko askatasunean irteteko
agindua eman zuen atzo Parisko Helegite Auzitegiak. La Sante espetxetik
irtendakoan «kulturaren aldeko militantzian» jarraituko duela esan zuen. Solek
preso politikoen egoera salatu zuen eta Oihane Errazkin uztailean bere buruaz
beste egin zuen euskal presoa ere gogoan izan zuen. Frantziako justiziaren
inguruan esan nahastu egiten zutela «elkarte kultural bateko kide» izatea «gaizkile
elkarte bateko kide» izatearekin. Isabelle Coutant Peyre bere abokatua La
Santera joan zen Soleri lehen harrera egitera. Peyrek esan zuen Soleren
askatasuna Gobernuaren aurkako garaipena zela eta «Sole berritu» egingo dela. «Espetxeak
suntsitzeko eginak daude», gaineratu zuen.
Sole aske uzteko baldintzak hauek izan dira: bere alabaren etxean bizi beharko
du, departamentutik 15 egun baino gehiago ateratzeko baimena eskatu beharko dio
epaileari, ezingo du armarik eduki eta leporatzen zaizkion ekintzak egin ziren
lekuetara ere ezingo du joan. Hala ere, CARB Bretainiako Errepresioaren Kontrako
Koordinadorak Soleren askatasuna ospatu zuen atzo eta oraindik preso jarraitzen
duten beste hiru presoak gogoratu nahi izan zituen. «Burua tente duela atera da
preso bretainiar hau eta bere ideiei uko egin gabe», esan zuen CARBek.
Uztailaren 9an epaileak Sole baldintzapean aske uztea erabaki zuen, baina pasa
den abuztuaren 3an Fiskaltza Antiterroristak erabaki horren aurkako errekurtsoa
aurkeztu zuen. Asteartean Parisko Gorteak Fiskaltza Antiterroristak ezarritako
errekurtsoa aztertzea erabaki zuen. Ateak itxita egin zen bilera. Isabelle
Coutant-Peyre Alain Soleren abokatua haserre agertu zen audientzia publikoari
zuzendua ez zegoelako. Peyreren esanetan, Audientziak iraun zuen bitartean
Beatrice de Beaupuis fiskalak Sole «egindako guztiagatik damutzea» nahi zuen.
Presoaren abokatuak adierazi zuen «Solek bere pentsatzeko askatasunari uko
egitea» zela Fiskaltzaren helburua. Atzo La Santeko espetxean justiziak
independentzia falta argia zuela salatu zuen. 51 urteko preso bretainiarra
1999an espetxeratu zuten eta pasa den martxoan 6 urteko kartzela zigorra ezarri
zioten. 1998an eta 1999an ARB Bretainiako Armada Iraultzaileak aldarrikatutako
hiru atentatutan parte hartzea leporatzen diote Soleri. Plevin herrian
(Côtes-d'Armor) lehergailuak lapurtzeagatik ere salatu zuten. Sole diabetiko
kronikoa da eta kartzelan bi aldiz eman zion bihotzekoak. Azken hilabeteetan
bere osasun egoera oso larria zen. Uztailaren 20an medikuen zaintzari uko egin
zion eta greba hasi zuen bere egoera salatzeko. Baldintzapeko askatasunak,
Fiskaltzak behin baino gehiagotan oztopatu duena, hil ala biziko garrantzia du
Solerentzat. Kartzelan tratatzen zuten mediku eta zirujauek ere nabarmendu zuten
presoa kartzelatik kanpo zaindu beharra zegoela. Baina Fiskaltzaren oztopo hauek
ez dira bakarrak izan. Lehengo urtean, Fresnesko espetxeko medikuak presoari eta
diputatu bati jakitera eman zien Soleren hainbat osasun-txosten falta zirela.
Medikuaren esanetan, ezinezkoa zitzaion 1999tik gaur egunera gaixoaren kontrol
bat jarraitzea. Osasun-txosten hauek Fresnesko edo Villepinteko espetxeetan
lapurtu edo gorde zituztela garbi dauka medikuak. Alain Soleren aldeko
elkartasun ekintzak egin dira azken egunetan Bretainian. Pasa zen igandean An
Orianteko Herrialde Zelten Jaialdian egin zen manifestazioa Soleren askatasuna
eskatzeko. Ekitaldian 150 pertsona inguruk parte hartu zuten, horien artean
Eugene Riguidel arraunlari ezagunak. An Orianteko manifestazioak izandako
arrakasta baliatzen ari dira independentista bretainiarrak. Asteartean,
abuzturen 3a, 50 lagunek kontzentrazio bat egin zuten Auzitegiaren aurrean.
Bretainiako banderak eta Soleren argazkiak erakutsi zituzten.