Article dans Berria - 02.10.2004

Keverko erasoagatik auzipetutako beste preso bat askatuko dute gaur
Stefan Philippe militante independentista bretoiak lau urte egin ditu Parisen espetxeratuta

ANDER FADDA - NAONED
Stefan Philippe preso politiko bretainiarra gaur askatuko dute, Bretainiako Errepresioaren aurkako Batzordearen (CARB) bozeramaile Klaod Le Duigouk iragarri duenez. Frantziako polizia antiterroristak atxilotu zuen Philippe, 2000ko maiatzaren 4an, ARB Bretainiako Armada Iraultzaileko kide izateaz akusatuta, eta gaur arte Parisen izan dute espetxeratuta.
Gilbert Thiel epaileak mugimendu independentistaren aurka agindutako sarekada handi baten barnean atxilotu zuten. Joan den martxoan epaitu zuen Parisko Auzitegi Bereziak, beste 10 militanterekin batera. Frantziako Estatuaren ondasunen aurkako hiru atentatutan parte hartu zuela ebatzi zuen auzitegiak eta sei urteko espetxe zigorra jarri zion. Keverko (Quevert) McDonald's-en aurkako atentatuarekin, aldiz, zerikusirik ez zuela eduki ondorioztatu zuen.
Keverko laurak deitu izan diren Stefan Philippe, Gael Roblin, Kristian Georgeault eta Paskal Laizek iazko maiatzean salatu zuten Frantziak Bretainiako mugimendu abertzalearen eta bereziki ezker independentistaren aurkako «sorgin ehiza» egin zuela. Keverko atentatuarekin inongo zerikusirik ez zutela nabarmendu zuten eta martxoan egin zieten epaiketak agerian utzi zuen Thiel epaileak zuzendutako ikerketa osoa. Jean-Pierre Chevenement Frantziako Barne ministro ohiaren alderdikoa da Thiel. Auzia politikoa zela salatu izan du Errepresioaren aurkako Batzordeak beti. Philipperi kartzelatik ateratzeko baimena ukatu zioten hainbat aldiz. Abuztuan eman zioten, azkenean. Keverko auziaz gain, Plevingo (Cotes-d'Armor) leherkarien lapurretaren auziaz ere akusatu dute Philippe. Poliziaren arabera, ARBk eta ETAk egin zuten lapurreta, 1999ko irailean.
Zaintzapean
CARBen bozeramaile Klaod Le Duigouk Gerard Bernarden kasu bitxiaz hitz egin du berriarekin. Bernard An Orienteko kaiko zamaketari ohia da. 2002ko urrian askatu zuten, ia 3 urtez preso egon ondoren. Hala ere, kontrol judizial zorrotz baten pean dago eta ezin du An Orientetik atera.
Parisko Helegite Auzitegiak behin eta berriz baztertu du kontrol hori kentzeko eskaera. Bere dosier penala eskuratzeko aukera onartu diote, ordea, Europako Giza Eskubideen Ituneko 6. artikuluan oinarrituta. Alabaina, dosierra Parisko Justizia Auzitegiak dauka, eta preso ohiak ezin du hara joan. Klaod Le Duigouren arabera, «bere burua giza eskubideen aberritzat jotzen duen horren [Frantzia] hiriburura joan behar izatea dosierraren berri izateko, Gerard Bernarden defentsa eskubidearen aurkako oztopotzat jo behar da». Gainera, Lorienten bizi behar izateak bere ogibidean lana aurkitzea eragozten dio. Izan ere, horretarako mugitu egin beharko luke. Beraz, ez dauka nahikoa diru Parisera joan ahal izateko.
P PRESOEN BALDINTZAK
Torturen lekukotasun zuzena Europako Legebiltzarrean

Paskal Laize presoari dagokionez, Le Duigouk iragarri du CARBek Europako Legebiltzarreko Eskaera Batzordeko idazkaritzari eman diola Parisko Justizia Epaitegian 2000n izandako gertaera baten berri. Horrekin batera, presoen osasun egoeraz ikerketa bat egiteko eskatu du.
Gerard Bernarden lekukotasuna da CARBek Bruselara bidali duena. 2000ko urriaren 10ean gertatu zen. Preso ohi bretainiarrak kontatzen du Parisko Justizia Auzitegira eraman zuten aldi batean Paskal Laizek jasandako tratu txarren lekuko izan zela. Auto istripu baten ondorioz, belaunezurrak gaizki ditu eta makuluekin ibili behar du. Jendarmeek, baina, eskuak bizkarrean lotu zizkioten eta eskailera kiribilak igoarazi zizkioten. Oreka galdu eta eskaileretan behera erori zen, eta jendarmeek ez zuten ezer egin altxatzeko. Ondoren, arrastaka eraman zuten.